முல்லைத்தீவு புதுமாத்தளன் பகுதியில் தற்போது வைத்தியசாலை எதுவும் இல்லாததால் இங்குள்ள 400 இற்கும் மேற்பட்ட குடும்பங்கள் தமது அவசர மருத்துவ தேவைகளைப் பூர்த்தி செய்வதற்கு சிரமங்களை எதிர்கொள்கின்றன.
அம்பலவன் பொக்கணை இடைக்காடு புதுமாத்தளன் வலைஞர்மடம் செம்மன்குன்று ஆகிய பகுதிகளில் 400 இற்கும் மேற்பட்ட குடும்பங்கள் வாழ்ந்து வருகின்றன. மாத்தளன் பகுதியில் உள்ள வைத்தியசாலை இறுதி யுத்தத்தினால் மிகமோசமாக சேதமடைந்து வைத்திய சேவைச் செயற்பாடுகள் செயலிழந்துள்ளன.
இந்நிலையில் புதுமாத்தளன் பகுதியில் அமைக்கப்பட்ட ஆரம்ப சுகாதார நிலையம் அதன் பணிகள் நிறைவுற்ற போது இதுவரை திறந்து வைக்கப்படவில்லை. இதனால் இப்பகுதி மக்கள் 10 கிலோ மீற்றருக்கு அப்பால் சென்றே அடிப்படை மருத்துவத் தேவைகளை பெற்றுக்கொள்ளவேண்டியுள்ளது.
எனவே இப்பிரதேச மக்களின் அவசர மருத்துவ தேவையை நிறைவுசெய்வதைக் கருத்தில் கொண்டு இவ் வைத்தியசாலையை இயங்க வைக்க நடவடிக்கை எடுக்குமாறு கோரிக்கை விடுக்கப்பட்டுள்ளது.
