பத்தரமுல்லையில் நேற்று திங்கட்கிழமை நடைபெற்ற ஊடகவியலாளர் மாநாட்டில் உரையாற்றும் போதே அமைச்சர் சம்பிக்க ரணவக்க இவ்வாறு தெரிவித்தார்.
அமைச்சர் இங்கு தொடர்ந்து உரையாற்றுகையில், யுத்தத்தில் எமது படையினர் விஷ ஆயுதங்களை பயன்படுத்தி 1,49,000 தமிழ் மக்களை கொன்றார்கள் என்று பொய்யான குற்றச்சாட்டுக்களை சுமத்தி ஐ.நா. மனித உரிமைகள் ஆணைக்குழுவிற்கும் சர்வதேச நாடுகளுக்கும் மன்னார் ஆயர் இராயப்பு ஜோசப் கடிதங்களை அனுப்பினார்.
டேவிட் கமரூன் யாழ்ப்பாணம் சென்றபோது பாதிரிமாரையும், மக்களையும் ஒன்றுதிரட்டி இலங்கைக்கு எதிராக கருத்துக்களை வெளியிடச் செய்தவரும் இவரே ஆவார்.
இவ்வாறு நாட்டின் சட்டங்களையும் அரசியலமைப்பையும் மீறி துரோகம் செய்யும் மன்னார் ஆயர் இராயப்பு ஜோசப்பை கைது செய்ய வேண்டுமென எவரும் குரல் கொடுப்பதில்லை.
அதற்காக ஆர்ப்பாட்டம் நடத்தப்படுவதுமில்லை. இராயப்பு ஜோசப்புக்கு எதிராக சட்டம் இயங்குவதில்லை. ஆனால் பௌத்த குருமார் ஆர்ப்பாட்டம் நடத்தினால் கூட்டம் நடத்தினால் கைது செய்யப்படுகின்றார்கள். நீதிமன்றத்தால் பிடியாணை பிறப்பிக்கப்படுகின்றது.
பொதுபல சேனா, ராவணா பலய பௌத்த குருமாருக்கு எதிராக சட்டத்தை அமுல்படுத்துமாறும் கைது செய்யுமாறும் வலியுறுத்துவோர் இராயப்பு ஜோசப்பின் நாட்டை காட்டிக் கொடுக்கும் செயற்பாடுகளுக்கு மத்தியில் மௌனம் காக்கின்றார்கள்.
கொழும்பில் 2,56,000 தமிழ் மக்கள் வாழ முடியுமானால் ஏன் வடக்கில் சிங்கள மக்கள் வாழ முடியாது? வட மாகாண முதலமைச்சரும் கொழும்பில் தான் வாழ்கிறார். ஆனால் சிங்கள மக்கள் வடக்கில் குடியேற்றப்படும் போது வடக்கில் சிங்கள மயமாக்கல் நடப்பதாக கூறுகின்றார்.
சம்பந்தனும் இதனைத்தான் கூறுகின்றார்.
எனவே பயங்கரவாம் ஒழிக்கப்பட்ட நாட்டில் தமிழ் இனவாதமும் ஒழிக்கப்பட வேண்டும்.
இராயப்பு ஜோசப்பின் நாட்டுக்கு எதிரான நடவடிக்கைகள் தொடர்பாக கத்தோலிக்க திருச் சபையும், கர்தினால் மெல்கம் ரஞ்சித்தும் கவனம் செலுத்தி நடவடிக்கை எடுக்க வேண்டும் என்றார்.
